حركشات

فاجأنا وغاب. رجلٌ أدمن صنع المفاجآت، فاجأنا في ليلة آذارية وغاب.

كان يشعر أن صديقاً اسمه يسوع يسكن في بيته

أما صديق الموت فكان يرفرف بجناحيه المتهدلين خارج كل شعور.

وكانت الحكاية بلا مقدمات   

وليلة تغتصبها الآهات

وسماء بلا نهاية

ورجل مسكون بالحيوية والحب

لم أنتبه كيف ابيضَّ شعري

حين انفتح الباب

ولم يدخل أحد

كنت ما أزال أسمعه يدندن:

سيقتلني حبي!

رجل عصامي حمل على كتفيه أثقال الحياة وعبر

قطع الطريق الفاصلة بين الحلم والحقيقة

كانت النياشين تتدلى من قلبه المتعب

وكانت الأكتاف لا تنوء تحت أثقالها

أفظع حقيقة كانت تؤرقه في حياته:

“سيأتي يوم أُحمل فيه على أكتاف رجال

يعرفونني

ولا أعرفهم”

في عرفه

لا توجد طريق تؤدي إلى نهاية معلومة

كل الطرق تؤدي إلى المجهول

الجرأة أن تعبر بلا وجل

الجرأة أن تعبر بثقة

الجرأة أن تثق بمن هو أهل للثقة

وأن تثق بمن هو غير أهل لها أيضا،

وبذلك تعمل على تعميم الثقة

رجل مولع بالكلمات

الكلمة في عرفه

ترف يفضي إلى الحبور والطمأنينة

رجل يؤمن بأننا:

“وُلدنا لنتدرب على اللعب البريء بالكلمات

ولنكتب بألوانها

أسماء ما نحب من الأشياء الصغيرة والكبيرة”

خانك قلبك يا صديقي

وأنت الوفيُّ فوق العادة

خانتك الحياة

وكنت تُعلّم صناعة الحياة

خانك الله

والملائكة

ويسوع

وبقيت كما كنت قبل أكثر من خمسين عاماً:

رجل يعشق التبشير بالقيامة

لن ننسى ضحكتك التي تشبه شجرة زنزلخت مبحوحة الأغصان!!

* * *

ماهر سلوم

آذار ـ 2007

————–

ـ قصائد متفرقة ما زالت حبيسة الأدراج للمرحوم جرجس عارف عوّاد (أبو خلدون)

لمين الحزن تا لابسه أسود    

بعدك قصيدة حب مجنونه

كل ما شفت ها ليد بتداعب الشعرات

بيجن فيي الشوق

آه يا جنوني

ضلي اضحكي تا ينقهر نيسان

ويسجد أمام الكنز والمونه

رح احملك عا قد مافي شوق

بقلبي وروحي

إي وبعيوني

رح احملك عاشي جرد مهجور

صارت خضرتو بعيد مدفونه

نزرع ترابو ورد ورياحين

تتصير موطن حب مسكونه

يا حلوتي قومي بنص الليل

نهرب سوى.. ناطرك سهران

شو مخوفك؟ شو رح يقولوا الناس؟

سكران هربت معو بالليل ملعونه

*****

رح ازرعِك فلّي بيقلب ها الدفتر

زهرة عطر بتطّل من بين السطور

.. حكيتيني.. بتحبي الشعر

رح اكتبِك وبخاف انك تزعلي

وما عاد شوف بعيونك سرور

أنا شيطان شعري كبير لا تفلي

ضلي.. خلي الحكي يكبر

وبركان قلبي يثور

كل القصايد الك

يا لوحة الفنان بتطلي

*****

ها لصوت لما بسمعو .. بيرد فيي الروح

بشوف الدني احلى .. ريحة عطر بتفوح

فيكْ الورد كلو.. وكل الحلا

لما ايديك يلامسو كفي..

كل الالم بيروح

ما بظن فيي زعلك شي يوم

يا رفيق عمري.. يا توأما للروح

إن زادت جروحي مين فيه يطيبا

وحدك شفائي وبلسم ها لجروح

*****

شو عمل ها لقلب تتزوّدي جروحو

شرايين قلبي ليش ع بتقطعي

شو عملت قولي

ولك بحبك

وشراع قلبي ببحر عينيك سري

ولك بحبك

متل الطفل عا صدر أمو

مهما قتلتو.. بيبقى بيحبها

ولو طلّعِت روحو

زوادتي صرتي.. وبحة الموال

معجم حروفي.. مرفأ شراعي

وشال

انتي المنارة.. لما القمر بيغيب

موقد دفىء بجنينتي وعرزال

معقول فيكي تبعدي عني

نحنا اللي كنا نكايد العزال

إيدك اعطيني تابوسها بلهفه

راسك ع صدري ريّحي

خلي زنودي يطوقوا جسمك

يشدوا وما يوجعوا

وتبادليني الشد

ونصير نسرق

واتشيطن زيادي

وقلك بحبك

وتسمع الوادي

واصرخ بحبك

وتسكّتي شفافي..

بقبلة حب..

تنسّي الدني، وفيها

تركتي لساني يحس طعمة السكّر

وتسكر..

مشوار لا أحلى ولا ع البال

1ـ 2 ـ 1984

*****

يا حلو.. ع مين صرت كبير

ما بحبك

نيسان أحلى.. ورد ورياحين

شو بعيد قلبي لعاشق لنيسان

شو بعيد ع المتلك

لحظة وهم كانت

لما سرقت البحر بعيونك

وغرقت

تاشوف كنو الوفى عندك

وتعبت

توصلت حد الشط

شطك صخر مهجور

كانت غلطتي لما تركت

روحي.. تسبح بشطك

اتركني يرزقك الله

ما منلتقي لأنه

بقلبي الوفى والحب

وكل الصخر عندك

*****

شايف زنودك بيداعبا تشرين

والريح ليش كتير مجنونه

فيكي البرد يا ريح بدنا دفا

خايف عليكي برد الشتي مئذي

يا ريت فيكي تسكني عيوني

شو مزوقه بزيت هاك البيت

يا ريت صرلي بعرفو شي عمر

عتبي بعرفو تخمين

قلبي عشق ريحة الحلوين

وضحكة شفافك..

كل الهوى والحب عطيوني

قومي افرحي برد الشتي بيضيع

ايدي بايدك للهوى تشريع

شو نار حاسس بكفك

تكوي ضلوعي.. كيف الشفايف

شو بخاف اني لامسا

وايدي بغفله بسرقة حرامي

بتداعب الحلمات..

هونيك شفتا النار مدفونه

يا الله سوا نسكر بعب الليل

شو ناطرا قومي معي

لا شي نحنا مهربين

عندي قلب مجنون

وبظن عندك قلب مجنونه

*****

يا صغيرة يا مقصرا الفستان

بكير جهلانه

تهدي ع قلبي شوي

ختيار أنا.. وزنود دبلانه

لا تخدعك هيك كلماتي

يا حسرتي ما ضل عندي غير الحكي

رح تزهقي من الكلمات

وشوفك بتالي الليل هربانه

بكرا بتذكري لما بخط الشيب عندك

وبترتمي ع البحر ندمانه

رح ترجعي من سكرتك ع صحو

ولك آه شكراني

يا ريت فيني رجع ها لزمن

وارجع صغير وتبقين عشقانه

*****

يا أستاذ الأبجدية

علمني شي كم غنية

واعطيني بالحب دروس

حاكيني وغازل عينية

هيكي اكتبتلي بالدفتر

صبية بعدا بأولتها

فرحانة بحالها عم تكبر

وجها لون البدر مدور

وشعراتا سنابل ببيدر

ولون عيونها مرج الأخضر

عاجبها!.. رح جرب حالي

ما بتعرفني اني مختير

واعدتها والخوف بقلبي

ليش عاجبها؟.. راحت إيامك يا أسمر

وراح النوم يجافي عيوني..

بدي اسهر

جمّع كلماتي حضرها.. ما رح اخسر

وتلاقينا شفت بعينا نصلة خنجر

وسمعتها.. حكيت.. حكيت

صوت مزمجر

بدها مني.. ما بتعطيني.. لازم نشهر

بدها اكتبلها غازلها

بدها حالها بدر مصور

بدها احكي لكل الناس عليها..

ورد مزهّر..

بدها حالها سيرة عنتر..

وتغير ها لكون بعيني

لونه أغبر

وصارت كلماتي مشلوله.. عم تتحجر

بيضيع الواحد من إيدو

لما بيسكن فيه الآخر

من الجنة نزلتو لـ آدم

من الجنة نزلتو حوا

وتركيتو يعيش معتر

*****

ها لصوت لما بسمعو .. بيرد فيي الروح

بشوف الدني احلى .. ريحة عطر بتفوح

فيكْ الورد كلو.. وكل الحلا

لما ايديك يلامسو كفي..

كل الالم بيروح

ما بظن فيي زعلك شي يوم

يا رفيق عمري.. يا توأما للروح

إن زادت جروحي مين فيه يطيبا

وحدك شفائي وبلسم ها لجروح

*****

عا مدرستو راح وبكّر

فرحان بمريول جديد

الخرجيه بجيبو خباها

وبالشنته في كتاب ودفتر

شو بصلّي يحفظ خطواتو

ويحمي الطفل العما بيكبر

بكرا بيكبر..

بارودي بإيدو يحملها

حتى يقاتل.. ع الجبهة مع صف العسكر

يحمي حدود بلادو بهمه

يودعني رايح يا أمي

هونيكي بقلب الخندق

كل عيون رفاقي بتسهر

طلعت ضجه صوت قنابل

قالوا غاره الصوت تكبّر

ارتج الدار التحتانيه

وبلور شبابيك تكسر

وعشية جوني ع الدار

كل رفاقو اصوات بتزأر

يا غازي موطن أجدادي

تهدّى.. كبر الحقد بقلب رفاقي

للّي راحوا بدنا نثأر

*****

شفتا من بعيد بها لشارع

وشعراتا صارو جدّولي

ومريولا يا بحر الهادي

وكراسة بإيدا فرحانه

من مدرستا يمكن جاي

وبتصعد ع رصيف الشارع

بتقلب صفحات الدفتر

فرحانه.. كلو تصاوير

وبتركض تتروح لأما.. اللي ناطرتا

وأهل البيت بقلب الشارع

سكران وراكب سيارة

شو تغير ها لمرج الأخضر

يبست أوراقو بكير

يا سنابل ها لأرض الحبلى

بدنا طفله

متل الطفله اللي عرفناها

ويمكن أحلى

*****

حبيبتي أكتر..

إي كلون خمس تيام

وبيمرقوا أحلام وبخاطرك بعدا

لا قلبك بيهدا ولا ها لقلب أصبر

حبيبتي أكتر..

تا ضل اتذكر وابكيلك

طلع بصدري وقول يا ويلك.. اتذكر

شو صدري ضحك.. اتذكر

وحبيبتي وسع الفضا والمرج والبيدر

وقد ما في ببوستك سكر

ولك بتعرف شو في ببوستك سكر

إيه حبيبتي أكتر

بكرا.. شوارع غربتي بتبكي ولامين

بيوديلها الضحكه..

اغمرني بشعري شد خصلاتو.. تكبر

عغنجاتو.. خلي الخصل تحلم وتتغندر

وبشدتك تسكر..

أحلى ما خصلي تقول

لا أختها.. طقي وموتي شدني أكتر

إيه ولك حبيبتي

حبيبتي أكتر

*****

مايلت صوب الدار ما لقيتك

واندهت ردت امك وخيتك

خفت حالي يشمت بحالي

اتظاهرت اني ضيعت بيتك

وسألتهن ما بتعرفولي بيت ع باب دارو معرشي فلي

وفي ياسميني ع الحلا مطلي .. وضيعت حالي

وصرت بدي ضيعك

وسألتهن ما بتعرفولي بيت بيضل متل العيد..

وسطوح ها لقرميد.. وبعرفو بيتك بلا قرميد

قالوا وصوتهن صوتك.. ويا ريت

ضليت اكذب يا حلو تا اسمعك

يا لضعت مني ضل .. ضيعني معك

وأنا وأنت.. وصدى صوتي.. اتركني حبك

لا تخوفني خفت كتير وأنا جايي لعندك

أحملك حبي

لا ترجعني رجعت كتير وأنا مدريي ما بين الناس وقلبك

أنا بحب الزند الوعر.. بحب الايد اللي ما بتترك

خصلة شعر وما بتشدا.. تشدا بقهر

وبحب الهدير الشايف حالو عنتر عبسي بقلبك

وآخر صوت بحنجرتي

ببعتلك ياه

اتركني حبك

واذا ما حبيتك أنا.. لا تدور ع مين يحبك

أنا أول قلب وآخر قلب بيوسع قلبك

*****

حبابي..

منين جبتو ها لحلا.. وجيتوا

تركتو عندي موال.. بقلبي خبيتو

حبابي.. لما ع بابي دقيتوا..

حسبت صوتي .. بدو يعلا يعلا

حسبت بدي انده.. أهلا أهلا

بس ما بعرف ليش صوتي اختفى

يمكن غار قلبي من صوتي وبرعشاتو اختفى

حبابي

لما ع بابي طليتو

وشمس محبتكم صارت عليي تخيّم

احتارت ايديي شو بتعمل

بترقص؟ بتغني؟ ولاّ بتمد تا تسلّم

ولساني..

لساني ساعتها ما عرف شو قال

ضاعت الكلمات وتشرد الموال

حبابي.. اذا شي مرة نسيتو

قلبي بدو يضل يدق

ومن دقتو بيطلع الموال

*****

بعتلك مع آخر يوم بها لشتي مكتوب مسوكر

يوصل لأيد اللي بحبا .. واللي بيتا كل ما مرقت بشوفو مسكر

وعلّمت المكتوب يدق .. ان لاقاكي يعطيكي حالو

وان ما لاقاكي ع الباب.. يمد المازا ويقعد يسكر

بعتلك مع آخر يوم بها لشتي مكتوب مسوكر

دليتو عليكي قلتلو بيتا خلف الشهوه الفيكي

بشهوه وأكتر

ودراجو بترهج جهلاني

متل الصبية العمرا تسعطش..

وجوزا مختير

وباب الدار مشيطن متل المغترب اللي تجوز وحدي

من عنا وتركها وسافر

ومسكت بابهون.. وحدا مرميي ع حالا وعمم تتذكر

ملياني عشق ومهمومي وعم تتذكر

شو عمري صار؟

وشو عمر اللي بحبا.. والعاشق أخبر

وعم تتذكر أيا شي البدا تفل

وأيا شي البدها تطل..

وكلشي بذاكرتا في تنين أنا..

واللي بقلبي عما يزهر

مكتوبي فينا وما بتعرف تقرانا.. أو تتهجانا

حرف بدفتر..

متلا.. متل الفلاحين

أرضون روزنامة أيامون .. والأبجدية ها لبيدر

دليتو عليكي قلتلو

عندا شفاف بلون الخمرا..

اللي شربتها المجدلية من ايد المسيح بعنجر

وسألتو ما عرفتا؟.. لا لا تبعد أكتر

عا صدرا في أرنبين

واحد ربيتو ع ايدي

والتاني من الخلقة ازعر

وانطرت المكتوب يعود

وصار السهر بعيني يغفى

ويسهر

اتخيل عم بيعيّدها.. كل شي وشفافك اطيب

كل شي وها لصدر مدور.. اتخيل ولمحتو

جاي مهري قفاه من القعده قدام البيت

وراجعلي يكفي السكرا.. ومدينا المازا

عا حروفو الشهواني

وقعدنا نسكر

*****