الزائد أخو الناقص.. واللي اكتشف ها النظرية كان عقلو زائد، ومنّو ناقص أبداً.. زائد ومكتّر كمان.
بدّك برهان؟!.. سافر على لبنان!.. لبنان الكرامة، والمقاومة، والشعب العنيد، والجبال اللي ما بتنطال، والـ 10452كيلومتر مربع، والمربعات الأمنية، والفيدرالية، والصداقة مع سوريا وإيران والغرب وووو إسرائيل.
أما إذا كنت قليل مروّة (متل جنابنا)، وبتدوخ من السفر، خدلك حبة ديمنهدرينات وسافر بالنظر، وكحّل عيونك (عيوني إنتَ) بالمستقبل والجديد والمنار والأورانج والـ LBC.. وعوضك على الله!!
يا الله شقد في حرّية بلبنان!.. شعب بيتنفس حرية على مرّ الساعة فقط لا غير. شعب عندو الحرية متل البهار والفلفل، وبيرشّو ع السياسة والثقافة والاقتصاد والانتخابات والسياحة والانسان والنسوان!! يعني عندو حرية زايدة، ومكتّر كمان.
فكرك انو الحرية اللي بمخك تجربت بشي محل؟!…
“ليك، إذا قررت واحد ما تسمعلو لا تقلو سكوت ما تحكي! الأفضل تقلو احكي احكي يا خيي وانتي بها الوقت لا تسمعلو! هوّي ما رح يعرف انك مو عم تسمعلو! وحياتك فظيعة جربها! أحسن ناس بيعملوا هيك.. مين بدك الأمريكان مثلاً؟ في أحسن وأرقى من الأمريكان؟! إي هادا السيستيم الرئيسي تبعون!”*
هلق الأشقاء بلبنان عندون حرية ولا شك، وخود أمتال ع هيك حرية. أي شخص عندون ما عجبك فيك تشرشحو، فيك تسبو بالحكي حتى لو كان رئيس الجمهورية. هيك اللبنانية طلعوا بنتيجة انو الحرية انك تحكي البدك ياه، بس مين عم يسمعلك؟
المشكلة يا أخونا، إنو الحرية اللبناية متل البهار، والصيغة الطائفية اللبنانية مرق فاسد! وشو بدك ترش بهار تترش!!!
المشكلة يا أخونا، انو هلق ضروري يكون في حرية؟!.. برأيي وبرأي أبو الزوز، انو مش ضروري كتير، لأنو في بغال سارحة وما بتنعطى حرية.. ولك البغل بيلبط لبطة المجتمع بيجيبو بمجتمع تاني!..
***
ماهر سلوم
اكتب تعليق