حركشات

إذا كنت فضولي متلي.. أو كنت بتنرفز لأتفه الأسباب (أو لأعظم الأسباب.. ما بيهمّ).. أو كنت بتغضب بسرعة وبتندم بسرعة بعد كل غضبة.. أو كنت بتتمنّى تتخلّص من ها العادة المقيتة (الغضب) لتحافظ ع قلبك وضغطك والسكّري بدمّك، أو تبطّل تتعاطى (مو المخدرات لا سمح الله) الأدوية “المهدئة” أو “المضادة للاكتئاب”!!.. لهَي الأسباب (ولأسباب تانية انت بتعرفها وأنا ما بعرفها) رح ادعيك الليلة (أكيد مو ع العشا) لتشارك بها الاستبيان الغير شكل!.. مو بس بدعيك. ولك بترجّاك تشارك!!..

على فكرة، ها الاستبيان مانو مرخّص، وما بيتبنّاه أي مركز بحوث.. وبيتضمّن سؤال واحد وحيد (لا شريك له).. والسؤال هوّي: شو بيدفعك للنرفزة؟! صدّقني يا صديقي، ها الاستبيان بالنسبة لألك رح يكون (برداً وسلاماً) على نفسيتك، ورح يخليك تشعر بالتوازن!.. ها الاستبيان الغير شكل بيشبه اعتراف المؤمن أمام رجل دين، أو اعتراف المذنب أمام قاضي، أو اعتراف المُعارض أمام ضابط مخابرات، أو اعتراف المريض أمام طبيب نفساني.. مَ هدول كلّون بيحسّوا بالراحة والسكينة بعد كل اعتراف!!.. لهيك، خلّصني وتعا اعترف معي، واذا ما بتعترف… ذنبك على جنبك!

مش مطلوب منّك، يا صديقي، اسمك ولا عمرك ولا جنسك ولا علمك ولا وضعك الاجتماعي. المطلوب منّك تذكر عدة شغلات (شغلة أو أكتر) بتخليك تنرفز أو تعصّب أو تطلع من دينك، وشرط تكون ها الشغلات بعيدة عن السياسة والسياسيين، والأحزاب والحزبيين، والدّين ورجال الدّين (منشان تمرق على هالموقع.. شي بينرفز)، وما تكون ملطوشة من مواقع أخرى، وتترك الباقي علينا.. نحنا رح نعملّك أفظع تحليل ودراسة، ورح نهديك خط بياني (مانو مستقيم أكيد) يمكن يفيدك للمستقبل.. المستقبل اللي غير ربك ما بيعرفو!!..

ما بعرف إذا كنت فهمت عليّ يا صديقي.. على كلٍّ رح اكتبلك عشر شغلات بتنرفزني (أنا شخصياً) وفيك تنسج على منوالون:

1- منظر بنتي الصغيرة اللي عمرا خمس سنين، وهيّ عم تتمايل قدام التلفزيون وعم تجرب “تخلع” على أنغام (اللذيذة) هيفا وهبي!.. ساعتها، الله وكيلك، بحتار: بلْعب دينار. عفواً.. بغيّر المحطة حرصاً على ذوق بنتي.. ولاّ ما بغيّر المحطة حرصاً على ذوقي.

2- منظر ابني الصغير وهويّ عم بيبحلق بالتلفزيون (كأنو أكلة يا زلمي)، وعم يتفرج ع (المحقق كونان) وقدّامو كومة بزر (ما بتعرف البزر من القشر).

3- الضيف اللي صرلو زايرني 3ساعات (وأنا والله العظيم مبسوط فيه)، بس ضروري ينطّرني نص ساعة على باب الشقة (وهويّ عم يرغي) قبل ما ينطق ها الجوهرة: تصبحوا على خير؟!

4- اللي بيحكي كتير، وما بيكلّ ولا بيملّ، وبيتفهمن عليك بكل شي، وبيناقش بالطب والدوا، وبينظّر بالسياسة والثقافة والاقتصاد والكهربا وتصليح السيارات والطبخ والفوتبول.

5- اللي بيدفع فاتورة العشا بالمقصف (وهويّ مبسوط وراضي) وبينطعج وقت دفع البخشيش.

6- اللي بيتحمّس وبيصرّ وبيخانق حتى يدفع الحساب بعد كل عزيمة عشا، بس ما بيدفع ولا مرّة.

7- عماد فوزي الشعيبي!.. إي بينرفز اللي عمرو ما تنرفز.

8- كل مسؤول حزبي أو مسؤول جبهوي بيعمل السبعة و…

9- الآنسة كونداليزا رايس (سابقاً) بس تضحك أو تبتسم (بتصير فيلم رعب أمريكي طويل اسمو الآنسة دراكولا)

10- المنجّمة نجلا قباني (مع انو اسمها على اسم أمي) لما تبصّر لمواليد برج القوس (مثلاً)، وبتحكي بثقة (عمياء) انو ها المواليد (متحدثون طلقاء ويجيدون فن الإصغاء والجدل والحوار)، مع انو الآلاف منّون حول العالم صمّ بكم بالولادة (العمى شووو عميا)!!.

………….

ماهر سلوم ـ http://sqlb.net/maher/